قصة قرار رفع الكهرباء

Posted on February 26, 2012

0


خف علينا يا ابو فادي

خف علينا يا ابو فادي

دخل رئيس الوزراء الى المجلس والغضب واضح على ملامح وجهه، وبالثانية التي دخل الباب فيها رن هاتفه النقال، وكانت الرنة (جاي تسنبل وارئي، سمره وانا الحاصوده)، فابتسم وزير الشؤون البرلمانية ابتسامه صفراء أخفاها وراء صف الأسنان السوداء..

أجاب الرئيس على هاتفه وصرخ: يا أم فادي قولتلك ما بحب الباميه!! ما بتفهمي أنتي!! يعني من الصبح وانا بلعب بالفيسبوك والتويتر لحتى ما عملت اكاونت ووقت الغذاء بلاقيكي عامله باميه، يبمي راسك!! انا رئيس وزراء ولا رجل كرسي، انا لازملي طاقة مشان أبلش بالشعب!! على كل حال بنحكي بالبيت، بدي نص ساعة وبروح، بنام بعدين بفضالك..

نظر سكرتير المجلس لأخذ أشارة البدء من الرئيس، وفعلن غمز الرئيس فتحي بريدة (سكرتير المجلس)، فوقف فتحي وقال بأعلى صوته:

اليوم المخطط ان نبعص الشعب بطريقة مبتكره، بدنا اشي جديد، إشي ما إنعمل قبل، لا بحكومة ابو ليله ولا بحكومة ابو رعد!! بدنا إشي كرياتف يا وزير تطوير القطاع العام، إشي يكون سبق يا وزير الطاقة، إشي بخالط الكذب يا وزير المالية…

فنظر الوزراء بوجوه بعض وكأن على رؤوسهم الطير! ونظروا الى فتحي بتعجب. فقام وزير البلديات الفهيم سوسو ابو ديدو وقال يا فتوح شو رأيك نقسم عمان 8 بلديات، الناس بتضج واحنا بننبسط. دغري طلع على رئيس الوزراء وقالو انتَ غبي عمو؟!؟! مالك؟ إنجنيت؟ بدك الناس يحكوا إنو مثلنا مثل غيرنا من الحكومات السابقة! حكينا بدنا إشي كرياتف! إلي بعدو…

فوقف وزير المياه والري وقال خلينا نفيض المجاري على مياه البلدية الصالحه للشرب، فأعجب الرئيس بالفكرة لكنه قال لندع هذه الفكرة للأيام القادمه.

سمع الرئيس من كل الوزراء ولم يعجبه شيء. لم يطرح الفريق الوزاري كله أي فكرة قوية!!! فتعجب الرئيس وبدأ فتحي، أو فتوح كما يحب ان يُدلع بالتململ.. وأذا بهاتف وزير التخطيط يرن فأستأذن ان يجب لأن المتصل كان البهلوان (ولا أحد يمكن ان يزحلق للبهلوان) فسمح له الرئيس بالرد على شرط ان يبقى داخل المجلس، فوافق المخطط الكبير. وفعلن فتح الخط على البهلوان، وكانت المكالمه كما يلي:

هلا سيدي، والله انك بالبال، أاا العطاء أخذوا ابن خالك، والعطاء الثاني اخذوا صاحبك.. والله قاعد بمجلس الوزراء.. كنه بمنفكر بطريقة نبعص الشعب، ممم، ممم، أها، مممم، فهمتك، والله منيحه، مو غلط… على راسي يا سيدي، والله انك مفضل على اهلي.. شو بتأمر؟ تجنيس 30 بس!! بسيطه يا سيدي، هاي ابو عامر وزير الداخلية هون، هلأ بعطيهم جنسية وأرقام وطنية كمان، واذا بدك بنصرفلهم كوبونات رز وسكر.. أبشر يا سيدي.. ممم، ممم، نعم، مممم….. حاضر يا سيدي.. بدك تروح تصلي؟ أأأأ والله لازم، يا سيدي الله يوفقك.. مممم، على راسي من فوق كل دار البهلوان، بهلوان بهلوان.. سلم يا سيدي على كل السيرك.. هلا هلا..

أنتهت المكالمة وعم الصمت في المجلس. سأل فتوح وزير التخطيط عن ما أخبره البهلوان به..

فأنتصب وزير التخطيط على طرف الطاولة وبجانب وزير التشريع والقانون روحي النمس، وقال:

البهلوان حلها يا جماعة، البهلوان أعطاني مجموعة قرارات اذا أخذناها سنضمن بعص الشعب نسمة نسمة وزيادة الحراك.. ففرح الحضور وبدأو يركزوا اكثر على كلام ابو التخطيط.

فأكمل ابو التخطيط كلامه عندما حس برضى الحضور، وقال:

البهلوان قال لازم اولاً أن نرفع اسعار الكهرباء، ثم اسعار المياه، ثم ان نخصخص ما تبقى من مؤسسات الحكومة، ثم ان نقمع كل من أراد التظاهر أو فتح فمه للشكوى!

وقال البهلوان ايضاً ان نرقي فلان وندعم علان، ونحبس الجنرال ونحرر الجرذان اتباع البهلوان.

ففرح الرئيس وعمة الفرحة أرجاء المجلس وقام فتحي بشك دبكة بقيادته ووزير الطاقة كذيل دبكة.. ثم أنتقلت الدبكة الى الدوار الرابع حتى توقفت كل السيارات للأشتراك بالدبكة ثم أنتقلوا الى مكافحة الفساد وقاموا بالدبك والرقص حتى ساعات متأخره من الليل..

وفي اليوم التالي قام وزير المالية بتصريحات أن الأردن أسوء من موزنبيق وأن حالتنا يرثى لها.. وكان ذلك لتحضير الشارع لوحدى من أكبر بعصاتهم.. ثم تررررااااا قام وزير الطاقة بالأعلان عن رفع فاتورة الكهرباء.. فوالا بعصه جديدة للشعب..

نسيت احكيلكوا شو صار بأم فادي زوجة رئيس الوزراء، عندما رجع ابو فادي من الدبك والرقص من أمام هيئة مكافحة الفساد، أخذ شور وقعد معها، وقال لها:

اسمعي يا أم فادي، أطلعي من راسي وسكري وراكي الباب، اذا بشوف باميه أو ملوخيه بالبيت بتكوني طالق.. وتوتة توتا خلصت الحتوتة..

Posted in: Jordan